Kev hloov kho hauv Tsab cai kawm ntawv ntawm tib neeg tsis taus, xyoo 1997
Cov cai tswj hwm raws txoj cai muaj tawm tuaj lawm

Tsab cai kawm ntawv ntawm tib neeg tsis taus xyoo 1997 (IDEA, 1997) yog tsab nrhiav kev txhim kho cov me nyuam tsis taus txoj kev kawm tau ntawv. Tsab cai no tsis yog yuav tswj hwm xyuas kom cov me nyuam tsis taus muaj cai tau mus kawm ntawv xwb, tsab cai tseem hais txog qhov xav cia kom lawv kawm tau ntawv kom siab.

Ceem fwv lub rooj tswj kev kawm ntawv ua tau cov cai tswj hwm raws txoj cai tawm rau hnub tim 12 lub 3 hlis, 1999. Cov cai tswj hwm no ua tau qeeb zog li lub caij teem cia vim cov kws txuj tseem los xyuas cov ntawv zej tsoom sau tuaj tawm tswv yim txog cov cai tswj hwm thaum lub 10 hli, 1997 uas muaj kwv yees li 6000 daim. Cov uas xav tau cov cai tswj hwm no mus saib, thov mus muab tau hauv KEV KOOM TES NTAWM TSEV NEEG THIAB COV TUB THOOB TSWV YIM TXOG KEV KAMW NTAWV www.fape.org.

Tam li tus me nyuam tsis taus leej niam thiab leej txi, niam txiv yuav tau paub qhov hloov tshiab ntawm tsab cai thiab cov cai tswj hwm no tias txoj cai no yuav raug rau tus me nyuam li cas vim qhov hloov ntawm txoj cai yog qhov tseem ceeb heev. Txhua tsab ntawv teeb kev kawm ntawm tus kheej uas yuav tau muab rov los xyuas, yuav tau txhim kho los puas tseem yuav tsim tawm tom qab hnub tim 1 lub 7 hli, 1998 yuav tsum muaj qhov tsab cai xyoo 1997 teev cia.

Yog yuav piav xaus cov txhooj lus ntawm tsab cai thiab cov cai tswj hwm los kuj yog ib qhov ntxhov kawg, li ntawd tsab ntawv no thiaj muab cov txhooj lus los piav kom yooj yim uas xav tias yuav raug cov niam cov txiv siab:

Kev xyuas raws li txhooj lus teev cia

Kev nyob tsis tswm thiab kev nyob tsis tswm li tau muab ntxiv rau cov kev tsis taus teev cia uas yog qhov hais tias"lwm hom kev tsis taus" uas yuav ua rau tus me nyuam muaj cai tau txais txoj kev pab.
Ceem fwv tau tso cai rau lub xeev los mus tshab txhais "kev loj hlob qeeb" rau cov me nyuam muaj hnub nyoog 3 xyoos mus txog 9 xyoos thiab yog cheeb tsam tsev kawm ntawv xaiv tias yuav siv raws li qhov teev cia no los, lawv yuav tau siv kev tshab txhais thiab lub hnub nyoog raws li lub xeev teev tseg.
Cov me nyuam yuav muaj cai tau txais kev kawm ntawv tshwj xeeb txawm tias lawv yuav kawm tau ntawv nce ib qib dhau ib qib.
Tsis pub muab cov me nyuam uas txawj lus As Kiv tsis txaus los sis tsis tau txais kev qhia nyeem ntawv los sis kev qhia ua zauv kom txaus coj los xaiv xyuas seb puas tsim nyog muab kev pab rau.
Yuav tsum muaj kev ntsuam xyuas txhua qhov raws li tus me nyuam xav tau rau hauv txoj kev kawm ntawv tshwj xeeb thiab kev pab cuam nrog, txawm tias qhov nws xav tau ntawd yuav tsis txuam rau kev tsis taus uas tshawb tau meej tias yog qhov ua rau nws tau txais kev pab (kev pab ntawd yuav muaj raws li qhov xav tau, tsis yog yuav muaj raws li qhov tsis taus.)
Qhov cov niam cov txiv xam pom yog qhov yuav muab coj los xaiv xyuas seb puas tsim nyog muab kev pab rau tus me nyuam.

Cov ntaub ntawv teeb kev kawm ntawm tus kheej

Tsab ntawv teeb kev kawm ntawm tus kheej yuav tsum hais txog qhov tus me nyuam yuav mus kawm nrog ib tsoom li cas, tsis tas no yuav tsum muaj tej hom phiaj kom dhos raws li qhov tus me nyuam xav tau kom nws muaj cuab kav kawm tau ntawv nrog ib tsoom.
Yuav tsum muab tsab ntawv teeb kev kawm ntawm tus kheej rau txhua tus xib fwb qhia ntawv thiab cov muab kev pab cuam tuaj uas yog cov muaj feem los lis tej hauj lwm pom thiab yuav tsum qhia lawv tej feem xyuam los lis lawv tej hauj lwm thiab los muab tej kev txhawb kom ua tau, muab tej kev hloov kho, thiab muab tej kev pab cuam raws li teev cia hauv tsab ntawv.
Yam tsawg kawg mas yuav tsum muaj me nyuam ib tug xib fwb qhia ntawv rau ib tsoom tuaj koom nrog kev sab laj yog hais tias tus me nyuam mus los sis yuav mus kawm ntawv nrog ib tsoom. Cov niam cov txiv thiab tsev kawm ntawv muaj cuab kav caw lwm tus neeg raws siab nyiam uas yog tus paub txog tus me nyuam mus koom kev sab laj no tau.
Pab tuaj sab laj npaj kev kawm ntawv yuav tsum xyuas txog ntau "qhov tseeb". Pab no yuav tsum xyuas txog: txoj kev pab txhawb kev sib txuas lus rau cov me nyuam tsis hnov lus los sis tsis pom kev raws li lawv hom lus los sis lawv hom kev txuas lus, nrog rau tej kev cuam tshuam los pab kho tus cwj pwm uas pheej txob txoj kev kawm, tej kev txhawb kev txawj lus As Kiv tsis txaus uas yog hom lus yuav tau qhia raws li tsab ntawv teeb kev kawm ntawm tus kheej hais, pab cov cuab yeej lawv xav tau, pab kev txuas lus li lawv xav tau. Pab neeg no tseem yuav tau xyuas lwm "qhov tseeb" ntxiv ntawm cov me nyuam tsis pom kev thiab yuav tsum npaj kev qhia ntawv ua pob rau lawv, tsuas ntshe yog pab neeg no ho tshawb pom raws li kev ntsuam xyuas tau yam meej pem tias kev qhia cov ntawv ua pob no los yog kev siv cov ntawv ua pob no tsis tsim nyog muaj rau tus me nyuam xwb.
Tsev kawm ntawv yuav tsum muab txoj kev kawm tau ntawv ntawm tus me nyuam qhia rau nws niam thiab nws txiv ib yam li kev qhia rau cov niam cov txiv uas tsis muaj me nyuam tsis taus.
Kev pab qhia ntawv pub ntxiv yuav tsum muaj rau txhua tus me nyuam uas muaj kev tsis taus raws li tsab cai tau teev cia, nrog rau tej kev pab raws li qhov tus me nyuam xav tau.

Kev txheeb xyuas hauv xeev thiab hauv cheeb tsam tsev kawm ntawv

Cov me nyuam tsis taus yuav tsum koom nrog txoj kev txheeb xyuas kev kawm tau ntawv hauv xeev thiab hauv cheeb tsam tsev kawm ntawv thiab yuav tsum muaj tej kev txhawb los sis tej kev hloov kho los pab kom lawv koom tau. Cov uas yuav koom tsis tau nrog los yuav tsum tsim kom muaj kev txheeb xyuas lwm hom rau lawv kom tau rau thaum lub 7 hli, xyoo 2000.
Kev txheeb xyuas kev kawm no yuav tsum ua kom tau tiav raws li hom lus cov me nyuam siv hauv vaj hauv tsev los sis siv hauv qhov chaw kawm ntawv (xws li tsev kawm ntawv) tsuas ntshe ho yog qhov yuav ua tsis tau lawm xwb.

Kev cob qhia

Tsis tas yuav muab kev qhia ntawv los rau tus me nyuam uas tau muab rho tawm hauv tsev kawm ntawv thawj zaug mus 10 hnub ntawm ib xyoos twg. Kev rho tawm tshaj li hais no lawm mas yuav tsum muaj kev pab raws li qhov pom cia rau tus me nyuam kom nws thiaj kawm tau cov ntaub ntawv qhia rau ib tsoom thiab thiaj kawm tau mus raws li cov hom phiaj teev tseg hauv tsab ntawv teeb kev kawm ntawm tus kheej.
Thaum kev rho tawm ho tshaj 10 hnub ntawm ib xyoo twg los sis kev rho tawm no yog qhov yuav hloov nws txoj kev kawm ntawv, pab sab laj teeb kev kawm yuav tsum sib ntsib los tsim kev txheeb xyuas txog qhov tus me nyuam coj tsis tus, yog tias qhov no yeej tsis tau muaj dua los li, los sis pab neeg no yuav tau tshawb xyuas txoj kev txheeb xyuas uas tau muaj dua los. Qhov xyuas seb puas yog los tsis yog kev tsis taus ua rau nws zoo li ntawd yuav tau muaj, yog tias kev rho tawm no yuav hloov nws txoj kev kawm ntawv. Thaum muaj kev rho tawm mus tshaj 10 hnub sib txuas zus los sis muaj kev rho tawm ntau tshaj 10 hnub ntawm ib xyoos twg ces puav leej yog qhov hloov txoj kev kawm ntawv.
Tsev kawm ntawv muaj cai rho tus me nyuam tawm mus 45 hnub rau tej kev nqa riam nqa phom los sis nqa yeeb nqa tshuaj; tus txiav txim plaub ntug yuav rho tus me nyuam tawm mus txog 45 hnub thaum pom tias yuav muaj tej kev tsis zoo.

Lwm yam

Thaum tus me nyuam tau daim ntawv kawm tiav qib 12 (tiav hauv high school) lawm yuav hais tau tias yog kev hloov nws txoj kev kawm ntawv lawm thiab yuav tau sau zaj lus li hais no tseg.
Yog muab daim ntawv qhia kev kawm tiav los ua kev qhuas uas tsis yog daim ntawv kawm tiav no ces, tus me nyuam tseem muaj cai tau txais kev pab kom txog thaum nws tau txais daim ntawv kawm tiav los sis muaj hnub nyoog raws li txoj cai teev tseg lawm.

Qhov hais los no tsuas yog tej qho uas tau hloov hauv cov cai tswj hwm raws tsab cai kawm ntawv ntawm tib neeg tsis taus tshiab. Yog xav paub ntau tshaj no, thov hu rau: Kev koom tes ntawm tsev neeg thiab cov pab thoob tswv yim rau kev kawm ntawv uas yog ib feem ntawm koom haum thoob tswv yim txog cai kawm ntawv

8161 Normandale Blvd.
Minneapolis, Mn 55437
Xov toog yog: 1-888-248-0822
Email: pacer@pacer.org
Web: www.fape.org

Ceem fwv rooj tswj kev kawm ntawv phab tswj kev kawm ntawv tshwj xeeb thiab kev pab peem lub neej nyob tuam ceeb Washington, D.C tau saib thiab pom zoo tso zaj lus no tawm.